د کلیو د بیارغونې او پراختیا وزارت محترم وزیر د پکتیا ولایت د ځدراڼو قوم له جهادي او قومي مشر سره وکتل
د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب نن په خپل کاري دفتر کې د پکتیا ولایت د ځدراڼو قوم له جهادي او قومي مشر الحاج عبدالرحمن ځدراڼ سره لیدنه وکړه.
د لیدنې په پيل کې الحاج عبدالرحمن ځدراڼ په هېواد کې له ډاډمن امنیت څخه خوښي څرګنده کړه او د پراختیايي پروژو د پلې کولو په برخه کې همکاري په ډاګه کړه او وویل: ډیر د خوښي ځای دی چې د کلیو د بیارغونې او پراختیا وزارت له لوري د هېواد په ګوټ ګوټ کې د خلکو د اړتیاوو پربنسټ پروژې پلې کیږي او زموږ ولس ورڅخه ګټه پورته کوي.
ورپسې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب الحاج عبدالرحمن ځدراڼ ته د ښه راغلاست ترڅنګ وویل: پکتیا یو جهادي ولایت دی، اسلامي امارت د هېواد ټولو ولایتونو ته په ځانګړې توګه محرومو او له اسانتیاوو څخه لرې سیمو ته ځانګړې پاملرنه لري، د کلیو د بیارغونې او پراختیا وزارت به د خپل شته امکاناتو سره سم په پکتیا ولایت کې لا زیاتې پروژې پلې کړي.
