په کاپيسا ولایت کې د اوبو رسولو او روغتیا ساتنې د دوو شبکو د پروژو چارې پيل شوې
د کلیو د بیارغونې او پراختیا ریاست تر چتر او نظارت لاندې، د یونیسف ادارې په مالي مرسته او د وزارت د کلیوالي اوبو رسولو او روغتیا ساتنې پروګرام له خوا د کاپیسا ولایت د تګاب ولسوالۍ په تترخیل او کوره کلیو کې د خلکو د لس سلنې ونډې او د (۱۵۳۲۳۴۶۴) افغانیو په لګښت د سولر پمپ سیسټم سره سمبال د اوبو رسولو د دوو شبکو چارې پيل شوې.
دغه پروژه (۲۰۳۱۷) متره اوږدوالی لري چې پکې کور په کور د شیردهنونو نښلول، د (سل) متر په عمق سره د دوو ژورو څاګانو کیندل، د څښاک پاکو اوبو د دریو کانکریټي اوسپني ذخیرو جوړول چې هر یو يې (۵۰) متر مکعب ظرفیت لري، د (۵۸) سولر تختو نښلول او د سولرونو د ساتنې لپاره د احاطوي دیوالونو جوړول شامل دي چې د یادې پروژې د کار په جریان کې به د نوموړو کلیو یو شمیر اوسیدونکو ته د کار زمینه برابره شي او د یادې پروژې د کار په بشپړیدو سره به (۸۷۰) کورنۍ، د دولس محراب مسجد شریف لمونځ کوونکي او د دوه باب مدرسو طالب العلمان د څښاک پاکو اوبو ته لاسرسی پيدا کړي.
