د کابل ولایت په سروبي ولسوالۍ کې د سړک ترمیم، د کانال پاکولو او د محافظوي دیوال د جوړولو د (47) فرعي پروژو چارې پيل شوې
د کابل ولایت په سروبي ولسوالۍ کې د سړک ترمیم، د کانال پاکولو او د محافظوي دیوال د جوړولو د (47) فرعي پروژو چارې پيل شوې
د کلیو د بیارغونې او پراختیا ریاست تر چتر او نظارت لاندې، د نړیوال بانک UNOPS په مالي مرسته او د اکټد دفتر په تخنیکي همکارۍ د کابل ولایت د سروبي ولسوالۍ په بیلابیلو کلیو کې د (3547683) افغانیو په لګښت د سړک ترمیم، د کانال پاکولو او د محافظوي دیوال د جوړولو د (47) فرعي پروژو چارې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده له خوا پيل شوې.
د کلیو د بیارغونې او پراختیا وزارت سرپرست وزیر الحاج ملا محمد یونس آخندزاده د یادو پروژو په پرانیستغونډه کې د سروبي ولسوالۍ اوسیدونکو ته خپله ارزښتناکه وینا وکړه او وویل: خلک پر موږ حق لري، موږ باید هڅه وکړو چې د خپلو ټولو هېوادوالو ته، په ځانګړي توګه کلیوالو ته چې په تیرو شلو کلونو کې له امکاناتو څخه محروم پاتې دي او هیڅ خدمت ورته نه دی شوی، اسانتیاوې برابرې کړو.
په دغو پروژو کې د (34025) متره سړک جغل اچول او ترمیم، د اوبو لګولو (37756) متره کانال پاککاري، د (849) متره محافظوي دیوال جوړول او (303 ) متره د اوبو لګولو ذخیرو ترمیم شامل دي چې په بشپړیدو سره به یې د (4499) کورنیو د اوبو لګولو او ترانسپورتي ستونزې هوارې شي.
د یادو پروژو په پرانیست غونډه کې د کابل ولایت د کلیو د بیارغونې او پراختیا رئيس مولوي محمد یونس حنفي، د وزارت د تمویل کوونکو مؤسسو مشر ډاکټر حیات الله، د کلیوالي اوبو لګولو د ودانیزو چارو رئیس اسدالله عمار، د وزارت د اطلاعاتو او عامه پوهاوي رئيس او ویاند ملا نورالهادي عادل، ، د اکټد دفتر مسوولینو، د یادو کلیو سپین ږیرو او اوسیدونکو ګډون کړي وو.
د یادونې وړ ده چې د سروبي ولسوالۍ په (155) پراختیايي شوراګانو کې د افغانستان معیشتي او ټولنیز ملاتړ پروګرام تر پوښښ لاندې د پروژو چارې جریان لري.
