په جوزجان کې ۱۵۱ کورنیو ته د څښاک اوبه چمتو شوې
د کلیو بیا رغونې او پراختیا وزارت د ولسي تړون ملي پروګرام له لوري د جوزجان ولایت مرکز اړوند په شبرغان ښار کې د زرګرخانه پراختيايي شورا لخوا د ۱.۲ میلیونه افغانیو په لګښت د څښاک اوبو یوه شبکه جوړه شوه. دغه شبکه ۸۹۷ متره اوږدوالی، ۸ نلکې، ۷۰ متره ژوره څاه ، یو برېښنایې پمپ او د ۱۰ متره مکعب ظرفیت په لرلو یوه اوسپنیزه زېرمه لري چې ۱۵۱ کورنۍ ترې ګټه اخلي.
د دې شبکې د جوړېدو په ترڅ کې لسګونه ځايي تخنیکي او نا تخنیکي کاریګرو ته کاري ورځې هم برابرې شوې.
د یادونې وړده چې مخکې پدې کلي کې یو شمیر نیمه ژورې څاګانې موجودې وې چې د اوبو د کچې په ټیټیدو سره نوموړې څاګانې وچې شوې او خلک د څښاک اوبو له کموالي سره مخامخ وو.
