په کونړ کې د ۲۵ میلیونه افغانیو په ارزښت د یو سربند او ۱۹۴ متره محافظوي دیوال د جوړولو کار روان دی
په کونړ ولایت کې د کلیوبیا رغونې او پراختیا وزارت د سیمه ییز پروګرام له لوري د ۲۵ میلیونه افغانیو په ارزښت د اوبو لګولو د سربند او محافظوي دیوال د جوړولو کار ۸۰ سلنه مخ ته تللی دی. د دغې پروژې په ترڅ کې د یاد ولایت د پیچ درې ولسوالۍ په لیچلام کلي کې له معیارونو سره سم د اوبو لګولو سربند او د ۱۹۴ مترو په اوږدوالي پوخ محافظوي دیوال د جوړیدو په حال کې دی.
د یادې پروژې د تطبیق پر مهال ۱۶۲۳ کاري ورځې رامنځته کیږي او په بشپړیدو به یې د سیمې ۲۵۷۱ اوسیدونکي ترې په مستقیم ډول ګټه پورته کړي. د یادونې وړ ده چې د دغې پروژې له لارې به هلته نه یواځې د ځايي بزګرانو ۱۵۰ جریبه کرهڼیزه ځمکه د اوبو لګولو تر منظم پوښښ لاندې راشي بلکې د سیمې د ګڼ شمیر کورونو تر څنګ به دغه ځمکه د سیلابونو له ګواښ څخه هم خوندي کړلی شي.
