په کندهار کې د اوبو لګولو د یوه کانال د جوړیدو کار روان دی
په کندهار ولایت کې د کلیو د بیا رغونې او پراختیا وزارت د سیمه ییز پروګرام له لوري د IFAD د پروژې په اډانه کې د اوبو لګولو د کانال د جوړولو کار روان دی. د دغې پروژې په ترڅ کې د یاد ولایت د ژیړۍ ولسوالي په چهار شاخه کلي کې د اوبو لګولو پوخ او معیاري کانال جوړیږي.
د یاد کانال د جوړولو پر مهال چې د آسیايي پرمختیايي بانک له لوري تمویل شوی لسګونه زره کاري ورځې رامنځته کیږي او په بشپړیدو به یې زرګونه ځايي اوسیدونکي ترې ګټه پورته کړي. د دغې پروژې له لارې به نه یواځې د سیمې لسګونه زره جریبه کرهڼیزه ځمکه او ګڼ شمیر باغونه د اوبو لګولو تر منظم پوښښ لاندې راشي بلکې د سیمې زرګونو اوسیدونکو ته به اوږد مهاله کاري بوختیاوې هم چمتو شي.
د یادونې وړ ده چې د کلیو د بیا رغونې او پراختیا وزارت په ځانګړي ډول د دغه وزارت سیمه ییز پروګرام د اوبو د مدیریت په برخه کې چې د حکومت لومړیتوب دی خپل مسوولیت په سمه تر سره کړی او دغه هدف ته د رسیدو په لار کې یې خپلې هڅې جاري ساتلي دي.
