په ننګرهار کې د ۳۰۰ کورنیو لپاره د څښاک پاکې اوبه برابرې شوې
د کلیو د بیارغونې او پراختیا وزارت د اوبو رسولو او کلیوالي حفظ الصحې پروګرام له لوري د ننګرهار ولایت د غنيخېلو ولسوالۍ په (۲۷مه) ویاله سیمه کې د یونیسیف/ یواس ایډ په مالي ملاتړ د ۴.۶ میلیونه افغانیو په لګښت د اوبو رسولو یوه لمریزه شبکه جوړه او د ځايي خلکو ګټې اخیستنې ته وسپارل شوه. ددغې شبکې په تکمیلېدو سره د شاوخوا ۳۰۰ کورنیو لپاره په کورونو کې د نل پاکې اوبه برابرې شوې.
په یاده شوې پروژه کې د یوې ژورې څاه کیندل، د یوې هسکې زیرمې، د سولرونو لپاره د یوې احاطې جوړول، د ۳۰ سولرونو، څه باندې ۳.۷ کیلو متره اوږدې د پایپونو د شبکې، په کورونو کې د ۱۰۴ د اوبو د مېترونو او ځینې نورو اړینو پُرزو او وسایلو نصبول شامل وو.
د اوبو رسولو ددغې پروژې د جوړولو چارو دغه راز د ځايي خلکو لپاره شاوخوا ۲۱۰۰ کاري ورځې رامنځته کړې.
