په ملي دسترخوان پروګرام کې تر اوسه څه باندې ۲۰ زره کورنیو ته خوراکي توکي وېشل شوي دي
د کلیو بیارغونې او پراختیا سرپرست وزیر پوهندوی مجیب الرحمن کریمي د حکومت د رسنیو په مرکز کې رسنیز کنفرانس ته وویل چې، د ملي دسترخوان پروګرام په ټول افغانستان کې د لیندۍ میاشتې په ۱۸ مه نیټه پیل شوی او تر اوسه یې په ۱۵۰ کلیو کې څه باندې ۲۰ زره کورنیو ته مرستندویه توکي ویشلي دي.
ښاغلي کریمي زیاته کړه: له نږدې ۱۳ زره هغو کلیو څخه چې په لومړي پړاو کې د ملي دسترخوان پروګرام تر پوښښ لاندې راځي، د ۱۱۲۰۰ کلیو معلومات بشپړ شوي دي، د ۹۸۰۰ کلیو د ګټې اخیستونکو لیست بشپړ شوی او په ۹۷۰۰ کلیو کې د څار او ویش کمیټې جوړې شوې دي او په ۳۰۰۰ کلیو کې د پرمختیایي شوراګانو حسابونو ته پیسې لیږل شوې دي.
د کليو بیارغونې او پراختیا سرپرست وزیر وویل، د روڼتیا په موخه په انلاین بڼه هر څوک کولای شي، د پروګرام په اړه معلومات ترلاسه کړي او که هر ډول ستونزه ویني، د ۳۳۳۰ وړیا شمېرې لارې د وزارت د اطلاعاتو او شکایتونو له جوړ شوي مرکز سره دې اړیکه ونیسي، تر څو په وخت یې شکایت ته رسیدګي وشي.
د یادولو وړ ده چې د یاد پروګرام په لومړي پړاو کې د افغانستان د ۳۴ ولایتونو په ۱۲۳ ولسوالیو کې ۱۲۸۹۶ کلیو کې ۱.۶۷ میلیونه کورنیو ته مرستندویه توکي ویشل کیږي او په دویم پړاو کې به د افغانستان د ۳۴ ولایتونو د ۲۳۵ ولسوالیو ۲۰۳۹۷ کلي تر پوښښ لاندې راولي، چې ۲.۵ میلیونه کورنیو ته به خوراکي توکي وویشي.
