په ننګرهار ولایت کې د استنادي دیوال، د اوبو لګولو د کانال او سربند د جوړولو کار روان دی
په ننګرهار ولایت کې د کلیو د بیا رغونې او پراختیا وزارت د سیمه ییز پروګرام له لوري د استنادي دیوال، د اوبو لګولو د کانال او سربند د جوړولو کار ۴۰ سلنه مخ ته تللي دي.
د دغې پروژې د فزیکي کار پر مهال به چې د IFAD له بودیجې تمویل شوې او د یاد ولایت د هسکې مینې ولسوالي په ثناخیلو کلي کې جوړیږي ۶۳۹ کاري ورځې رامنځته شي او په بشپړیدو به یې د سیمې ۲۴۰۰ کسه ترې ګټه پورته کړي.
د یادونې وړ ده چې یاده پروژه به د ځايي اوسیدونکو سلګونه جریبه کرنیزه ځمکه د اوبو لګولو تر منظم پوښښ لاندې راولي او تر څنګ به یې دغه ځمکه او ګڼ شمیر کورونه د سیلابونو له زیان څخه هم خوندي شي.
