په بغلان کې د پروګرام سپماګروپونو ته د سپما بکسونو وېش ترسره شو
د بغلان ولایت د بغلان جدید په ولسوالۍ کې د کلیو د بیارغونې او پراختیا وزارت د کلیوالي اقتصاد د پیاوړتیا ملي پروګرام د همکارې موسسې آغا خان بنسټ په مرسته سپماګروپونو ته د پیسو د سپمولو په موخه بکسونه ووېشل.
د دې بکسونو د وېش غونډه د ښځو چارو د ریاست، د بغلان ولسوالۍ د پرمختیایې شورا رییس، د قومونو مشرانو، ځوانانو علماو او د سیمې خلکو په ګډون سره د بغلان ولایت په مرکز کې ترسره شوه.
د یادونې وړ ده، چې تر دې دمه د کلیوالي اقتصاد د پياوړتیا ملي پروګرام فعالیتونه د بغلان ولایت په بغلان جدید ۵۴ پرمختیایې شوراګانو کې روان دي چې ۳۳۰ سپما ګروپونه یې جوړکړې له دې شمېر سپما ګروپونو څخه يې ۲۷۰ د مېرمنو او پاتې ۶۰ یې د نارینهو ګروپونه دي، یادو ګروپونو تر اوسه ۶۰۰ زره افغانۍ سپمولې دي.
