په ننګرهار کې د څښاک د اوبو پروژه ګټې اخیستنې ته وسپارل شوه
د کلیو د بیارغونې او پراختیا وزارت، په کلیوالي سیمو کې د اوبو رسولو او حفظالصحې د پروګرام له لوري، د ۳.۸ میلیونه افغانیو په لګښت، د ننګرهار ولایت د داعشځپلې ولسوالۍ سپینغر په «کَل» کلي د اوبو رسولو یوه لمریزه شبکه جوړه او ددغه کلي د شاوخوا ۲۵۰ کورنیو ګټې اخیستنې ته وسپارل شوه.
د اوبو رسولو په دغه پروژه کې د یوې ژورې څاه کیندل، د سولرونو لپاره د یوې احاطې جوړول، د ۲۰ لمریزو تختو سولرونو، په کورونو کې د اوبو د مېترونو او نورو اړینو پُرزو نصبول شامل وو.
