په کنړ کې د شپږ کیلو متره سړک د جوړولو چارې پیل شوې
د زېربناء په برخه کې د جمهور رئیس ستر سلاکار ډاکټر شاد محمد څرګند، د کليو بیارغونې او پراختیا وزیر پوهنمل مجیب الرحمن کریمي، د کرنې، اوبو او برېښنا وزارتونو مرستیالانو لخوا د پرمختیایي پروژو د ارزونې، څارنې او لومړیتوبونو د پېژندنې غونډې ترڅنګ د کنړ ولایت په خاص کونړ ولسوالۍ کې له حکیم اباد څخه تر اراضي بازاره پورې د شپږ کیلومتره سړک د جوړولو چارې پیل کړې.
د کليو بیارغونې او پراختیا وزیر وویل، په دې سړک ۲،۴ ميليونه افغانۍ لګښت کېږي، چې د اتو کلیو ۲۰۰۰۰ کورنیو ته به ترانسپورټي اسانتیاوې برابرې کړي.
د کليو بیارغونې او پراختیا وزیر زیاته کړه، د نرنګ ولسوالۍ د کوز نرنګ ۸۰۰ متره بولډروال پاتې برخه به هم جوړه شي، څو په بشپړ ډول سیمه د سیلاب له احتمالي خطره خوندي شي.
دغه راز د همغږۍ او د پروژو د ارزونې په ناسته کې د اړونده ادارو له استازو سره د بنسټيزو پروژو د پلي کېدو پر وړاندې د ستونزو د حل لارو د موندولو ترڅنګ، د اړونده سیمه ییزو ادارو د مسوولینو په وړاندیزونو او د پروژو په لومړیتوبونو هم بحثونه وشول، چې د وزارتونو په نویو پرمختیایي پلانونو کې به ځای شي.
