په غزني کې په تیرو ۳ کلونو کې د ۶۶ میلیونه افغانیو په ارزښت ۱۵ پرمختیايي پروژې پلې شوي
د کلیو د بیا رغونې او پرمختیا وزارت سیمه ییز پروګرام له ۲۰۱۶ زیږدیځ کال را پدیخوا د ۶۶ میلیونه افغانیو په ارزښت۱۵ عام المنفعه پروژې د غزني ولایت په بیلابیلو سیمو کې تطبیق کړي چې۱۲ دغه پروژې بشپړې او ۳ نورې یې د بشپړیدو په حال کې دي. د دغو پروژو په لړ کې چې۵ یې له ملي بودیجې او ۱۰ یې د نړیوال آسیايي بانک له لوري تمویل شوي ۳۷ زره او ۳۷۲ کاري ورځې رامنځته او ۸۳ زره او ۲۱۱ ځايي اوسیدونکي لدغو پروژو هر اړخیزه ګټه پورته کوي. د دغو پروژو د تطبیق پر مهال استنادي دیوالونه، د اوبو لګولو سربندونه ،کانالونه، ښوونځي، ټرانسپورټي پلونه او د اوبو لګولو کاریزونه جوړ شویدي. د یادونې وړ ده چې دغو پروژو د ځايي اوسیدونکو د ټولنیز ژوندانه په بیلابیلو اړخونو کې د پام وړ مثبت اغیز شیندلی دی.
