د کلیو د بیارغونې او پراختیا وزارت سرپرست د یو اين ډي پي (UNDP) له رئيس سره وکتل
د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده نن له غرمې مخکې په خپل کاري دفتر کې په افغانستان کې د یو این ډي پي (UNDP) له نوي رئیس ښاغلي سټیفن روډریکس او مل پلاوي سره وکتل. د غونډې په پیل کې په افغانستان کې د یو این ډي پي رئیس ښاغلي سټیفن روډریکس په افغانستان کې د یو این ډي پي د پروژو او فعالیتونو په اړه د کلیو د بیارغونې او پراختیا سرپرست وزیر ته معلومات ورکړل. ښاغلي سټیفن وویل، د دوی لپاره اړینه داده چې د افغانستان د خلکو د اړتیاوو په اساس پروژې طرحه کوي ترڅو مرسته شوي پیسې تر اړمنو خلکو ورسیږي او ستونزې يې تر یو حده هوارې شي. هغه زیاته کړه، دوی به کوښښ وکړي چې د یاد وزارت سره همغږي زیاته کړي او د خپلو همکاریو په دوام سره به نور هم د مرستو په زیاتوالي کې کوښښ وکړي. ورپسې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده د یو این ډي پي (UNDP) نوي رئیس ښاغلي سټیفن او ورسره مل پلاوي ته د ښه راغلاست ترڅنګ وویل: د کلیو د بیارغونې او پراختیا وزارت ستاسې د دوامداره مرستو قدرداني کوي او ټینګار يې وکړ چې باید اساسي پروژو ته حق اولیت ورکول شي او هغه لیرې سیمو ته کار وکړئ ، کوم چې په تیرو شلو کلونو کې ورته هیڅ کار ندی شوی. په پای کې د دواړو لوریو ترمنځ پر لا زیاتو همغږيو ټینګار وشو.
