د کلیو د بیارغونې او پراختیا وزارت محترم وزیر د پروان ولایت له مخورو او سپین ږیرو سره وکتل
د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب نن په خپل کاري دفتر کې د پروان ولایت له مخورو او سپین ږیرو سره لیدنه وکړه.
د لیدنې په پيل کې د پروان ولایت مخورو په دغه ولایت کې د کلیو د بیارغونې او پراختیا وزارت له فعالیتونو څخه رضایت په ډاګه کړ او وویل: الحمدلله مونږ ته اسلامي امارت داسې زمینه برابره کړې ترڅو خپلې ستونزې په اسانۍ سره تر لوړو چارواکو ورسوو او د لازیاتو پراختیايي پروژو د پلي کیدو غوښتنه وکړه.
ورپسې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب راغلو میلمنو ته د ښه راغلاست ترڅنګ د دوی شته ستونزې او غوښتنې په غور واوریدې او وویل: د افغانستان اسلامي امارت سره د نوموړي ولایت د خلکو تیر شل کلن تکلیفونه او ستړیاوې د قدردانۍ وړ دي او زیاته يې کړه چې د کليو د بيارغونې او پراختيا وزارت هغو سیمو ته لومړيتوب ورکوي کوم چې په تیرو شلو کلونو کې ورته هیڅ پاملرنه او کار شوی نه دی.
