د کلیو د بیارغونې او پراختیا وزارت محترم وزیر د آغاخان دفتر له رئيس او مل پلاوي سره وکتل
د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب نن په خپل کاري دفتر کې د آغاخان دفتر له رئیس ډاکټر نجم الدین نجم او مل پلاوي سره لیدنه وکړه.
د لیدنې په پیل کې د آغاخان دفتر رئيس د یاد دفتر د پروژو او فعالیتونو په اړه د کلیو د بیارغونې او پراختیا وزارت محترم وزیر صاحب ته معلومات ورکړل او وویل: په دې وروستیو کې موږ ډیرې بیلابیلې پراختیايي پروژې پلي کړي او کوښښ کوو ترڅو د خلکو د اړتیاوو پربنسټ په محرومو سیمو کې لا زیات کار وکړو.
ورپسې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب د آغاخان دفتر رئیس ډاکټر نجم الدین نجم او ورسره مل پلاوي ته د ښه راغلاست ترڅنګ وویل: الحمدلله اوس زموږ د هېواد په ګوټ ګوټ کې امنیت دی او تاسې پرته له کومې ستونزې کولای شئ خپلې پروژې په ښه کیفیت سره پلي او د کلیو د بیارغونې او پراختیا وزارت تل تاسې سره همکار دی.
په پای کې د دواړو لوریو ترمنځ پر لا زیاتو همغږۍ ټینګار وشو.
