په زابل ولایت کې (12) استنادي دیوالونه جوړ او ګټې اخیستنې ته وسپارل شول
د کلیو د بیارغونې او پراختیا ریاست تر چتر او نظارت لاندې، د نړیوال خوراکي پروګرام (WFP) په مالي مرسته او د ( ADA) مؤسسې په تخنیکي همکارۍ د زابل ولایت په مرکز قلات او شاجوی ولسوالۍ کې د (235000) ډالرو په لګښت د (12) استنادي دیوالونو چارې بشپړې او ګټې اخیستنې ته وسپارل شول.
د یادو استنادي دیوالونو له جملې څخه د شپږو دیوالونو چارې د دغه ولایت د مرکز اړوند په سپینه غبرګه اونورک سیمو کې بشپړې شوې چې هر دیوال (48) متره اوږدوالی او (۴) متره جګوالی لري. همدارنګه د شپږو نورو استنادي دیوالونو چارې د شاجوی ولسوالۍ په جمال خیلو او جعفرو کلیو کې بشپړې شوې چې په جمال خیلو کې څلور استنادي دیوالونه چې هر دیوال (48) متره اوږدوالی او (۴)متره جګوالی لري، ترڅنګ يې په جعفرو کلي کې دوه استنادي دیوالونه چې هر دیوال (80( متره اوږدوالی او (۳) متره جګوالی لري. په یادو پروژو کې (250) کاریګرو ته د کار زمینه برابره شوې وه.
