په کاپیسا کې پر ۶۳ بې ځایه شویو کورنیو مرستندویه توکي وویشل شول
د کاپیسا ولایت د کلیو بیا رغونې او پراختیا ریاست او د پیښو پر وړاندې د مبارزې ریاست له خوا پر هغو ۶۳ کورنیو خوراکي او نا خوراکي توکي وویشل شول چې د یاد ولایت د نجراب ولسوالۍ څخه د جګړو له کبله بې ځایه شوي وو.
په دې مرستندویه توکیو کې وړه، وریجې، غوړي، لوبیا، بوره، مالګه، چای، کمپلې د پخلنځي کیټونه او د لومړنیو روغتیايي مرستوکیټونه شامل وو.
باید ووایو چې تر سروې او د کورنیو تر کره کولو وروسته به پر ۵۰۰ نورو بې ځایه شویو کورنیو هم د خوراکي او نا خوراکي مرستندویه توکیو کڅوړې وویشل شي.
