د تجدیدوړ انرژۍ شرکتونو (RESCO) د رامنځته کولو په تړاو مشورتي ناسته تر سره شوه
د کلیو د بیارغونې او پراختیا وزارت د کلیوالي انرژۍ مارکېټ د بدلون نوښت پروژې(AREMTI) لخوا د تجدیدوړ انرژۍ شرکتونو د رامنځته کولو په تړاو لومړنۍ مشورتي ناسته جوړه شوه. په یاده ناسته کې، د کلیوالي انرژۍ مارکېت د بدلون نوښت پروژې رئیس، ښاغلي محمد اجمل شینواري، د کلیو په کچه د انرژۍ خدمتونو د وړاندې کولو په برخه کې د کلیو بیارغونې او پراختیا وزارت د تېرو اغېزمنو کارونو یادونه وکړه، او په دې برخه کې یې د خصوصي سکټور د ګډون پر ارزښت ټینګار وکړ. وروسته، د پروژې د تخنیکي ټیم لخوا د هېواد کلیوالو سیمو ته د برښنا رسولو په برخه کې د خصوصي سکټور د پانګونې د فرصتونو، د برښنا رسونې د بېلابېلو مالي موډلونو، او په دې برخه کې د ځینو نورو هېوادونو د بریالیو تجربو په هکله مفصل معلومات ګډونوالو ته وړاندې شول. ګډونوالو، چې د تجدیدوړ انرژۍ د شرکتونو استازي وو، د کلیو بیارغونې او پراختیا له وزارت څخه مننه وکړه چې ددې مهمې موضوع د بحث لپاره یې ناسته رابللې ده او د اړونده موضوع په هکله یې خپلې اندېښنې او نظرونه شریک کړل.
د تجدیدوړ انرژۍ شرکتونو د رامنځته کولو طرحې موخه د کلیو په کچه د برښنا کوچنیو شبکو په جوړولو، ساتنه او څارنه او د برښنا رسونې په خدمتونو کې د خصوصي سکټور د پانګونې لپاره د ظرفیت اوچتول او په دې برخه کې د ونډه اخیستنې زیاتوالی دی. پاکې، دوامداره او په مناسبه بیه برښنا ته د خلکو لاسرسی یو له دوامداره پرمختیایي موخو څخه ده چې افغانستان هم ورته ژمن دی. یادې موخې ته د رسېدلو لپاره، د خصوصي سکټور ونډه اخیستنه مهم رول لري.
د تجدید وړ انرژۍ شرکتونو په رامنځته کولو کې مرسته او د یادو شرکتونو لپاره د ظرفیت اوچتولو پروګرامونو عملي کول د کلیوالي انرژۍ مارکېټ د بدلون نوښت پروژې یوه مهمه موخه ده.
