په پکتیا کې د ۱.۷ میلیونه افغانیو په ارزښت د ۵۶۵ متره کرنیز کانال د جوړولو کار بشپړشو.
د کلیو بیارغونې او پراختیا وزارت د ولسي تړون ملي پروګرام له لوري د پکتیا ولایت د سید کرم اړوند د کندرخېلو د روزن خېلو کلي پراختيايي شورا لخوا د څه باندې ۱.۷ میلیونه افغانیو په ارزښت د یوه کرنیز کانال د جوړولو چارې بشپړې او ګټې اخیستنې ته وسپارل شو. دا کانال ۵۶۵ متره اوږدوالی لري چې د ځايي خلکو۳۸۰ جرېبه کرنيزه ځمکه خړوبوي، او ۱۸۷ کورنۍ ترې ګټه اخلي، دې پروژې تخنیکي او نا تخنیکي کاریګرو لپاره ۲۳۴۶ کاري ورځې رامنځته کړې وې.
. د يادونې وړ ده، چې د سید کرم ولسوالۍ لپاره د ولسي تړون ملي پروګرام له لوري د څښاک پاکو اوبو ته د لاسرسي، لمريزې برېښنا، فرعي سړکونو جوړولو او د اوبو لګونې په سکټورونو کې ۸۶ بېلابېلې پروژې منظور شوې وې، چې یو شمېر یې بشپړې او ګټې اخیستنې ته سپارل شوي او پاتې نورې به يې په نږدې راتلونکې کې بشپړې شي.
