په ۷ ولایتونو کې د ۱۲ ښوونځيو جوړولو کار بشپړ شو
د کلیو بیا رغونې او پراختیا وزارت د ولسي تړون ملي پروګرام د اقرا پروژې تر سیوري لاندې د میدان وردګو په حصه اول بهسود او سید اباد، د کابل په چهار اسیاب، د خوست ولایت په باک او ګربزو، د ننګرهارولایت په شینوارو، د روزګان ولایت په ګزاب، د فاریاب ولایت په پشتون کوټ ولسوالیو او د غزني په مرکز کې د ۱۲ ښوونځيو ودانۍ جوړې او ګټې اخیستنې ته وسپارل شوې.
دا ښوونځي ۱۲، ۱۰، ۸ یا ۶ ټولګي، تشنابونه او د څښاک د اوبو څاه ګانې لري او په ترڅ کې یې تخنیکي او نا تخنیکي کارګرو ته زرګونه کاري ورځې هم رامنځ ته شوې وې.
باید ووایو چې د دې ښوونځيو په جوړیدو سره ۳۴۱۵ تنو زده کونکو ته د ښوونې او روزنې وړ چاپیریال رامنځ ته شو.
