په بلخ ولایت کې د ۵۵۰ کورنیو لپاره د څښاک پاکې اوبه برابرې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظ الصحې پروګرام له لوري د بلخ ولایت د نهرشاهي ولسوالۍ په حسینآباد کلي کې د ۱۰ میلیونه افغانیو په لګښت د څښاک د اوبو یوه لمریزه شبکه جوړه او د خلکو ګټې اخیستنې ته وسپارل شوه. د اوبو رسولو ددغې شبکې په جوړېدو سره د شاوخوا ۵۵۰ کورنیو لپاره په کورونو کې د نلونو په مرسته د څښاک پاکې اوبه برابرې شوې.
د اوبو رسولو په دغه پروژه کې د یوې ژورې څاه کیندل، کابو ۱۸ کلیومتره اوږدې شبکې غځول، د سولرونو لپاره د یوې احاطې جوړول، د ۵۰ لمریزو تختو (سولرونو)، ۳۲۰ نلبندانونو او ځینې نورو اړینو پُرزو نصبول شامل وو.
د یادونې وړه چې ددغې سیمې خلکو ددغې پروژې تر تکمیلېدو مخکې د څښاک اوبه له هغو ټانکرونو څخه په پیسو اخیستې چې له لېرې ځایونو یې اوبه راوړلې او د حسینآباد پر خلکو یې پلورلې.
