په لغمان ولایت کې ( ٢٤٤) بیلابیلې پراختیايي پروژې ګټې اخیستنې ته وسپارل شوې
د کلیو د بیارغونې او پراختیا وزارت له لوري د لغمان ولایت په علیشنګ او بادپښ ولسوالیو کې د (٢٧٨) میلیونه افغانیو په لګښت د ( ٢٤٤ ) پراختیايي پروژو چارې بشپړې او د یوې غونډې په ترڅ کې د دغه وزارت د سرپرست وزیر الحاج ملا محمد یونس اخندزاده صاحب او مل پلاوي له خوا ګټې اخیستنې ته وسپارل شوې.
په دې غونډه کې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده صاحب، مل پلاوي، د ولایت معاون مولوي اختر محمد صاحب، د قول اردو درستیزوال قاري انځرګل صاحب، د دغه ولایت یو شمیر نورو مسؤولینو، د یادو ولسوالیو علماء کرامو، سپین ږیرو او ځوانانو ګډون کړی وو.
په یاده غونډه کې د کلیو د بیارغونې او پراختیا وزارت سرپرست وزیر خپله ارزښتناکه وینا وکړه او وویل: زمونږ هېواد او ولسونه زیات کار او خدمت ته اړتیا لري او د کلیو د بیارغونې او پراختیا وزارت هڅه کوي ترڅو کلیوالو ته د لا ډیرو اسانتیاوو برابرولو په موخه پراختیایي پروژې پلې او ستونزو ته یې پروخت رسېدنه وکړي.
په دغو پروژو کې د کلیوالي سړکونو جغل اچول او هموارول، د کرنیزو کانالونو جوړول او پاکول، د پیاده رونو، محافظوي دیوالونو، پلونو او پلچکونو جوړول شامل دي.
د یادو پروژو د کار په جریان کې سلګونه تنه کاریګرو ته د کار زمینه برابره شوې وه او په بشپړیدو سره يې په اړوندو برخو کې د نوموړیو ولسوالیو د اوسیدونکو ستونزې هوارې شوې.
