د « چهارشنبه علمی» لسم سیمینار تر سره شو
د افغانستان د کلیو پراختیا انسټیټیوټ د « چهارشنبه علمی» لسم سیمینار تر سره کړ چې سرلیک یې و « د سیمه ییزو همکاریو رول او د کلیو په پرمختیا کې یې ارزښت» سیمنار د اقتصاد وزارت د ستر سلاکار سهراب بهمن په وینا سره د کلیو بیا رغونې او پراختیا وزارت ۷۰ تنو مرکزي کارمنانو او په انلاین توګه ولایتي کارمنانو ته پیل شو.
سهراب بهمن د خپلو خبرو په ترڅ کې د سیمه ییزو همکاریو رول او د کلیو په پرمختیا کې یې ارزښت ته کتنه وکړه او ویې ویل « کلي له ښارونو بیل نه دي او د هیواد بې وزلي پوړونه په کلیو کې ژوند کوي. د کلیو د اقتصاد وده د هیواد د تولیدي بنسټونو د ځواکمنتیا لامل ګرځي او سیمه ییزې همکارۍ له سیمې سره د هیواد د تړلو سبب ګرځي»
ښاغلي بهمن همدا راز وویل چې د هیواد او کلیو د پرمختیا لپاره، مارکیټ جوړونه، د سیمه ییزې همکارۍ رامنځ ته کول او کیفیت لرونکې زده کړې له مهیمو ارزښتونو څخه دي او باید پام ورته وشي.
د سیمینار په پای کې د وزارت د مشرتابه پلاوي له خوا سهراب بهمن ته د هغه د همکارۍ او زیار په پار د مننې لوحه ورکړل شوه.
