په لوګر ولایت کې د اوبو لګولو د کاریز پروژه بشپړه شوه
په لوګر ولایت کې د کلیو د بیا رغونې او پرمختیا وزارت د سیمه ییز پروګرام له لوري د اوبو لګولو د کاریز پروژه چې څه باندې ۳ میلیون افغانۍ ارزښت لري بشپړه شوه.
د دغې پروژې په ترڅ کې د دغه ولایت په مرکز پورې اړوند زرداد کلا کلي کې د اوبو لګولو د کاریز څاګانې، د اوبو زیرمتونونه او د ۱۵۲۸ مترو په اوږدوالي د اوبو رسوونکی کانال جوړ شو.
د یادې پروژې د تطبیق پر مهال چې له ملي بودیجې تمویل شوې ۱۸۰۷ کاري ورځې رامنځته شوي او د سیمې ۱۸۹۰ اوسیدونکي له دغې پروژې ګټه پورته کوي. د یادونې وړ ده چې د دغې پروژې له لارې به په سیمه کې ۳۵۰ جریبه کرنیزه ځمکه هم د اوبو لګولو تر منظم پوښښ لاندې راشي.
