په کندهار ولایت کې د کلیوالي صنایعو ستر نندارتون پیل شو
د کلیو بیارغونې او پراختیا وزارت د جلالتمآب رییس جمهور د هدایاتو سره سم چې په کندهار ولایت کې باید د کلیوالي متشبثینو د تولیداتو د انکشاف او پراختیا په موخه لازم اقدامات ترسره شي، په لومړي قدم کې د دې وزارت د کلیوالي اقتصاد د پیاوړتیا ملي پروګرام له لوری د دوی د تولیداتو د بازارموندنې او پرمختیا لپاره د هېواد د اووه زونونو په کچه د کلیوالي تولیداتو ستر نندارتون په کندهار ولایت کې جوړ شو. یاد نندارتون چې د روان کال د لیندۍ میاشتې په ۱۲مه نېټه د کندهار ولایت په عینو مېنه کې رسماً د دې ولایت د والي مرستیال، سکتوري رییسانو، مدني فعالانو او رسنیو استازیو په وړاندې پرانیستل شو. په دې نندارتون کې د هېواد له ۷ زونونو څخه ۸۰تنه کلیوالي متشبثینو خپل تولیدات لکه لاسي صنایع، خوراکي توکي، زینتي توکي، زېورات...نندارې او خرڅلاو ته ايښي دي. د یادونې وړ ده، چې دا نندارتون به درې ورځې دوام وکړي او د قوس میاشتې په ۱۴مه نېټه به پای ومومي.
