په غور ولایت کې د ۲.۲ ملیونه افغانیو په ارزښت د څښاک د اوبو د یوې شبکې جوړولو کار بشپړ شو
د کلیو بیا رغونې او پراختیا وزارت د ولسي تړون ملي پروګرام له لوري د څه باندې ۲.۲ ملیونه افغانیو په ارزښت د څښاک د پاکو اوبو د یوې شبکې د جوړولو کار د غور ولایت د لعل او سرجنګل ولسوالۍ د منار شورابک کلي د پراختیایي شورا له خوا بشپر او د یو لړ مراسمو په ترڅ کې ګتې اخیستنې ته وړاندې شوه. د څښاک د پاکو اوبو دغه شبکه ۷۳۱۵ متره اوږدوالی لري او د ۱۶ زره لیتره اوبو د یوې زیرمې لرونکې ده. د دغې پروژې تربشپړیدو وروسته د کلي ۱۰۰ کورنیو د څښاک پاکو اوبوته لاسرسی پیدا کړی دی. د یادونې وړ ده چې ددغې پروژې د جوړیدو په بهیر کې ماهرو او غیرو ماهرو کاریګروته په مجموعي ډول ۱۸۴۰ کاري ورځې رامنځته شوې دي.
