په میدان وردګو ولایت کې د ۵۸ ښوونځیو د روغولو چارې روانې دي
د کلیو بیارغونې او پراختیا وزارت د ولسي تړون ملي پروګرام د اقراء برنامې له لوري په مرکز میدان ښار، نرخ، جلریز، سیداباد، چک، دایمیر داد او لومړۍ حصه بهسودو ولسوالیو کې دا مهال د ۵۸ ښوونځیو د رغولو چارې اویا سلنه بشپړې شوې دي. په میدان وردګو ولایت کې د ولسي تړون پروګرام ولایتي مسوو ل انجنیر نادر حقمل وایي، چې یاد ښوونځي د هغوو ۱۴۱ ښوونځیو له ډلې دي، چې د هېواد د سلمې کلیزې په ویاړ یې د بنسټ ډبرې ایښودل شوې وې. ښاغلی حقمل وایي چې دوی د پاتې ۸۳ ښوونځیو لپاره پروپوزل جوړونه او نور کارونه یې بشپړ کړي دي، چې ودانیزې چارې به یې ژر پیل شي.
