په غور ولایت کې ۳۴۵ کورنیو لپاره د څښاک پاکې اوبه برابرې شوې
د کلیو د بیارغونې او پراختیا وزارت په کلیوالي سیمو کې د اوبو رسولو او حفظالصحې پروګرام له لوري د غور ولایت د فیروزکوه ولسوالۍ اړوند ګنده آب علیا، سفلی او وسط کلیو کې د شاوخوا ۳۴۵ کورنیو لپاره د څښلو پاکې اوبه برابرې کړې.
په پورته ذکر شویو کلیو کې د اوبو رسولو درې لمریزې شبکې جوړې او ګټې اخیستنې ته وسپارل شوې. په دغو دریو شبکو باندې مجموعاً ۵.۹ میلیونه افغانۍ ولګول شوې .
د اوبو رسولو په دغو دریو پروژو کې د دریو څاه ګانو کیندل، د دریو زیرمو او د سولرونو لپاره د دوو احاطو جوړول، د څه باندې ۵،۸۰۰ متره اوږدې شبکې غځول، د ۱۶۵ نلکو، یو شمېر سولرونو او نورو اړینو وسایلو نصبول شامل وو.
د یادو شویو پروژو د جوړولو چارو دغه راز د ځايي خلکو لپاره څه د پاسه ۵۰۰۰ کاري ورځې هم رامنځته کړې.
