په خوست کې به د ۲.۴ ميلیونه ډالرو په ارزښت ۳۰ زره کسانو ته لنډ مهالي کاري بوختیاوې برابرې شي
د کلیو بیارغونې او پراختیا سرپرست وزیر پوهندوی مجیب الرحمن کریمي، د پوهنې سرپرستې وزیرې اغلې رنګنیې حمیدي او ورسره مل پلاوي خوست ته د خپل سفر په لړ کې بیلابیلې پروژې ګټې اخېستنې ته وسپارلې او هم یې د خلکو ستونزې واوریدې.
د مراسمو په پیل کې خوست والي مهمند کټوازي د ښه راغلاست ترڅنګ د یاد ولایت د خلکو اساسي ستونزې شریکې کړې.
ورپسې په ولسي جرګه کې د خوست استازو، ولایتي شورا وکیلانو، مدني فعالانو، قومي مشرانو، مېرمنو او ځوانانو د یاد ولایت ستونزې چې د ولسي تړون نورو سېمو ته غځول او د زېربینایي پروژو پلي کول یې مهمې هغه وې، په خپلو خبرو کې یادې کړې.
د کلیو بیارغونې او پراختیا وزیر د پوهنې وزیرې ته د یاد وزارت د ولسي تړون ملي پروګرام د اقراء برنامې لوري ۴۵ ښوونځیو ته نوې جوړ شوې ودانۍ رسماً وسپارلې چې ۶۹ زره زده کوونکو ته یې د زده کړو وړ چاپیریال برابر کړ.
همدارنګه د کلیو بیارغونې او پراختیا وزیر پوهندوی مجیب الرحمن کریمي د پروژو د پرانېستې د مراسمو په موخه جوړ شوي رسنیز کنفرانس ته وویل، په خوست کې به ۲،۴ میلیونه ډالره په ارزښت ۳۰ زره کسانو ته لنډ مهالي کاري بوختیاوې برابرې شي.
د کلیو بیارغونې او پراختیا وزیر زیاته کړه، په خوست کې د ۱۳۹۹ کال په جریان کې ۴۵۹،۶ ميلیونه افغانیو په ارزښت د ۱۶۹ پروژې بشپړې شوې دي او ۹۲۲.۱۴ میلیونه افغانیو په ارزښت د ۲۵۶ نورو پرمختیایي پروژو چارې د ترانسپورت، اوبو رسولو او اوبه خور په برخو کې روانې دي.
د کلیو بیارغونې او پراختیا وزیر پوهندوی مجیب الرحمن کریمي وویل، په ۱۴۰۰ کال به د ۱.۵۲ میلیارده افغانیو په ارزښت ۱۵۶ پرمختیایي پروژې پلې شي.
