په جوزجان کې د ۱۶.۶ میلیونه افغانیو په ارزښت د ۶ پرمختیایي پروژو کار پیل شو
د کلیو بیارغونې او پراختیا وزارت د اوبو رسولو، اوبه خور او حفظ الصحې ملي پروګرام له لوري په جوزجان ولایت کې د ۱۶.۶ میلیونه افغانیو په ارزښت د ۶ پرمختیایي پروژو د تطبیق کار پیل شو.
په دې پروژو کې د شبرغان ښار د ماشومانو په روغتون کې د ۱۰ مترمکعبه یوې ارتفاعي زیرمې جوړول، د فیض اباد ولسوالۍ په بیزکک کلي کې د دوو ارتفاعي زیرمو په لرلو سره د ۱۱.۴ کیلومتره د اوبورسولو د یوې شبکې جوړول او دیوې ژورې څاه کیندل، د شبرغان ښار د قلعه شهر په خاتون ښوونځي کې د ۶ غرفو درلودونکي یو مبرز جوړول، د اقچې ولسوالۍ په ځدراني کلي کې د ۲۰۰ متره ژورې څاه کیندل، د اقچې ولسوالۍ په شیرک شور میدان کلي کې د دوو ځمکنیو سر پټو زیرمو جوړول او هم داقچې ولسوالۍ په کول بقال سفلی کلي کې د دوو زیرمو جوړول شامل دي.
دا پروژې به په ۶ میاشتو کې تطبیق شي او ۲۷۹۰ کورنۍ به یې له ګټو څخه برخمنې شي.
