د مالیاتو د ورکړې اوونۍ نمانځغونډې په ویاړ جوړ شوي نندارتون کې د کلیو بیارغونې او پراختیا وزارت د کلیوالي اقتصاد د پياوړتیا پروګرام د ګټه اخیستونکو ګډون
د ماليې وزارت په دې موخه چې د مالیاتو د ورکړې قانون په افغانستان کې حاکم او د هېوادوالو ترمنځه کلتور وګرځي، د هېواد په کچه د خصوصي سکتورونو د تولیداتو او محصولاتو لپاره درې ورځنۍ نندارتون د کابل په بادام باغ کې جوړ کړ.
په دې نندارتون کې چې د مالیاتو د ورکړې اوونۍ تر نامه لاندې د مالېې وزارت په کوربه توب جوړ شوی و، د کلیو بیارغونې او پراختیا وزارت د کلیوالي اقتصاد د پیاوړتیا پروګرام یو شمېر ښځینه متشبثینو هم خپل لاسي تولیدات او خوراکي توکې نندارې او پلورنې ته وړاندې کړل.
د کلیو بیارغونې او پراختیا وزارت محترم وزیر پوهندوی مجیب الرحمن کریمي له ماليې وزارت څخه د دې نندارتون د جوړولو په مناسبت د مننې ترڅنګ وویل: « افغانستان د یو داسې هېواد په توګه چې د ودې په حال کې دی، له بل هر وخت څخه د مالیاتو د منظمې ورکړې سیستم ته اړتیا لري، د مالیاتو د ورکړې اوونۍ نمانځل او د داسې نندارتونونو جوړول په دې لار کې د دې سترې موخې په ترلاسه کولو کې ډېر ګټور دي.»
د ماليې وزارت سرپرست وزیر ښاغلی محمد همایون قیومي، د کرنې اوبو لګولو او مالدارۍ وزیر ښاغلی نصیر احمد دراني، د سوداګرۍ او صنایعو خونو مرستیال محمد یونس مومند او د صنایعو او معادن خونې رییس شېر باز کمین زاده هم په دې مراسمو کې حضور درلود، چې د مالیاتو د ورکړې د منظم سیستم په ګټورتیا یې د غونډې برخوالو ته ویناوې وکړلې او د هېواد په اقتصادي وده کې یې د مالیاتو ورکړه اغیزمنه یاده کړله.
