د کلیو د بیارغونې او پراختیا وزارت محترم وزیر د پکتیا ولایت له والي سره وکتل
د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب نن په خپل کاري دفتر کې د پکتیا ولایت له والي مولوی مهرالله حماد سره لیدنه وکړه.
د لیدنې په پيل کې د پکتیا ولایت والي په یاد ولایت کې د کلیو د بیارغونې او پراختیا وزارت له اغیزمنو کارونو څخه مننه وکړه او وویل: د هېواد په ګوټ ګوټ کې بېلابېلې پراختیايي پروژې پلې شوي او زموږ ولس ورڅخه ګټه پورته کوي نوموړي د پکتیا ولایت د خلکو د اړتیاوو پر بنسټ، د پاکو اوبو رسولو، پلونو، پلچکونو او کلیوالي سړکونو د جوړولو پروژو د پلي کېدو غوښتنه وکړه.
ورپسې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب د پکتیا ولایت والي ته د ښه راغلاست ترڅنګ وویل: د کلیو د بیارغونې او پراختیا وزارت د پروژو د پلي کولو پرمهال لومړیتوبونه په پام کې نیسي او د متوازن انکشاف له مخې کار کوي. موږ تل کوښښ کوو خپل ولس ته داسې ټولګټې او پراختیايي پروژې پلې کړو چې له اسانتیاوو څخه يې څوک بې برخې پاتې نه شي.
