په کابل ولایت کې شاوخوا ۱۶۲کورنیو ته د څښلو پاکې اوبه برابرې شوې
د کلیو د بیارغونې او پرمختیا وزارت، په کلیوالي سیمو کې د اوبو رسولو ملي پروګرام له لوري ، د کابل ولایت د شکردرې ولسوالۍ په «ګل داد خېلو» او «حکیمخېلو» کلیو او د استالف ولسوالۍ په «خواجه حسن» کلي کې د اوبو رسولو دوې پروژې په دې وروستیو کې بشپړې او د خلکو ګټې اخیستنې ته وسپارل شوې.
په یادو پروژو کې د استالف ولسوالۍ په «خواجه حسن» کلي کې د اوبو رسولو د یوې لمریزې شبکې او د شکردرې ولسوالۍ په «ګل داد» او «حکیمخېلو» کلیو کې په لاسي بمبو سمبال د دوو څاه ګانو کیندل شامل وو.
په دغو پروژو باندې مجموعاً (۳،۱۷۲،۹۳۰) افغانۍ لګښت راغی چې د دولت له اختیارې بودجې نه د مالیې وزارت لخوا ورکړل شو.
د یادو پروژو د جوړولو چارو د ځايي خلکو لپاره (۱،۸۶۴) کاري ورځې ایجاد کړې او د پروژو په بشپړېدو سره په ذکر شویو کلیو کې د شاوخوا (۱۶۲) کورنیو لپاره د څښلو پاکې اوبه برابرې شوې.
