په بدخشان کې د پاکو اوبو رسولو په برخه کې د څه دپاسه ۵۴ مېلیونه افغانیو پروژې روانې دي
د سه شنبې په ورځ د کلیو بیارغونې او پراختیا وزیر پوهنمل مجیب الرحمن کریمي، د بدخشان له والي احمدفیصل بیګزاد سره ولیدل.
د لیدنې پرمهال د بدخشان والي هلته د ولسونو یو شمېر ستونزې او اړتیاوې چې د سړکونو، پاکو اوبو او نورو ټولګټو پروژو په اړه وې شریکې کړې.
د کلیو بیارغونې او پراختیا وزیر پوهنمل مجیب الرحمن کریمي وویل، امکاناتو ته په پام، مونږ به لکه د بدخشان کوچني پامیر ته په لومړي ځل د سړک جوړولو پروژې په څېر ټولو هغو سیمو کې د ولسونو پر اړتیاوو کار وکړو چې دوي ته اسانتیاوې راولي.
د کلیو بیارغونې او پراختیا وزیر وویل:"ددې تر څنګ چې تېر کال په بدخشان کې د سړک جوړونې په برخه کې ۷۸ کیلومتره سړک او مجموعا ۲۸۴ متره پلونه جوړ شوي، د روان کال لپاره هم ۴۱،۵ کیلومتره نور سړک او ۱۲۰ متر پل په پلان کې دي، چې د ترانسپورټ په برخه کې ډېرې ستونزې ورسره حل شوي او حل کیدونکې دي."
د کلیو د بیارغونې او پراختیا وزیر زیاته کړه، د کلیوالي اقتصاد د پیاوړتیا ملي پروګرام په ترڅ کې به چې تازه په بدخشان کې پیل شوی، د پور او سپما له ۱۶۲ اتحادیو سره د پینځو کالونو په جریان کې د ۱۰۴ مېلیونه افغانیو مرسته وشي.
ښاغلي کریمي وویل، د پاکو اوبو رسولو په برخه کې دا مهال په بدخشان کې تر ۵۴ مېلیونه افغانیو په زیاته اندازه بودیجه، پروژې روانې دي.
