د کلیو بیارغونې او پراختیا په وزارت کې د خپلواکۍ د سلمې کالیزې په ویاړ د کتاب نندارتون پیل شو
د کليو بیارغونې او پراختیا وزارت د له خوا د (یو کارمند، یو کتاب) په نوم نندارتون د کلیو بیارغونې او پراختیا وزیر پوهندوی مجیب الرحمن کریمي په حضور کې نن په یاد وزارت کې پیل شو.
د کليو بیارغونې او پراختیا وزارت د انسټېټوټ سرپرست رئیس شهزار ځدراڼ د نندارتون د پرانېستې په مراسمو کې وویل، چې پنځه کاله وړاندې د انسټېټوټ کتابتون د ۱۲۰۰ کتابونه په درلودو، جوړ شو، چې اوس د دې کتابتون د کتابونو شمېر ۶۰۰۰ کتابونو ته رسیږي او هره ورځ ۶ــ۷ کارکوونکي له کتابتون د مطالعې لپاره کتابونه وړي.
ځدراڼ زیاته کړه، چې د الکترونیکي کتابتون د ډيټابیس په جوړولو کار روان دی، چې کتابونو ته د کارکوونکي لاسرسی اسان شی.
د کليو بیارغونې او پراختیا وزیر پوهندوی مجیب الرحمن کریمي د کتابونو د لوست په ارزښت خبرې وکړې او زیاته کړه، چې د الکترونیکي کتابتون جوړولو کار ګټور دي او سپارښتنه یې وکړه، چې د انستېټوټ ټول علمي مواد باید د وزارت په ویب سایټ کې پر لیکه شي.
د یادونې وړ ده ، چې یاد نندارتون په اتو برخو کې د یوې ورځې په موخه د وزارت په انګړ کې د مراجعینو پر مخ پرانېستی دی.
