په اروزګان کې د ۲۰۸ ميليونه افغانیو په ارزښت د ۳۱ ښوونځيو د ودانیو د جوړولو چارې پیل شوې
د کليو بیارغونې او پراختیا وزیر پوهنمل مجیب الرحمن کریمي د سې شنبې په ورځ د اروزګان ولایت له والي محمد شفیق اسد الله سعید سره د یاد ولایت د ستونزو اوریده او حل په موخه ولیدل.
د اروزګان ولایت والي د ترانسپورټي لارو، پلونو او ولسي تړون ملي پروګرام نورو ولسوالیو ته د غځولو غوښتنې د کليو بیارغونې او پراختیا له وزیر سره شریکې کړې.
د کليو بیارغونې او پراختیا وزیر پوهنمل مجیب الرحمن کریمي وویل، چې په اروزګان کې د ۲۰۸ ميليونه افغانیو په ارزښت د ۳۱ ښوونځيو د ودانیو د جوړولو چارې پیل شوې او د دې ترڅنګ په اروزګان کې د ولسي تړون ملي پروګرام له لوري د څه باندې ۷۲ ميليونه افغانیو په ارزښت د۴۹ پرمختیايي پروژو چارې د اوبو رسولو، ابیارۍ او ټرانسپورټ په برخه کې روانې دي.
