په غزني کې د ۵ میلیونه افغانیو په ارزښت ۴ پرمختیايي پروژې بشپړې شوې
د افغانستان د کلیو بیا رغونې او پرمختیا وزارت د ولسي تړون پروګرام له خوا د غزني ولایت د ناور ولسوالۍ په سردریا، شایګان او قماش و عمران کلیو کې د نږدې ۵ میلیونه افغانیو په ارزښت ۴ پرمختیايي پروژې بشپړې شوې په دې ترڅ کې د دریو سر پټو کرنیزو کانالونو او د یوې څاه د ایستلو پروژې ګټې اخستنې ته وسپارل شوې، په ټوله کې د کانالونو اوږدوالی ۱۰۰۰ متره و، او د کار په ترڅ کې یې ۴۰۰۰ فني او نا فني کارګرو ته د کار زمینه برابره شوې وه. باید ووایو چې ددې پروژو په بشپړتیا سره به ۱۸۱۰ جریبه کرنیزه ځمکه خړوبه شي او ۸۵ کورنۍ به یې له ګټې برخمنې شي.
