په کندز ولایت کې راستنېدونکو کډوالو لپاره د اوبو رسولو یوه شبکه ګټې اخیستنې ته شوه
د کندز ولایت د کلیو د بیارغونې او پراختیا ریاست له لوري د دغه ولایت د چهاردرې ولسوالۍ د خواجه کفتر په ښارګوټي کې راستنېدونکو کډوالو لپاره د څه باندې (۳) میلیون افغانیو په لګښت د اوبو رسولو یوې شبکې د جوړولو چارې بشپړې او ګټې اخیستنې ته وسپارل شوه.
په یاده شبکه کې د (۱۴۰) مترو په ژوروالي د یوې څاه کیندل، د (۲۰) متر مکعب په وړتیا د پاکو اوبو یوې ذخیرې جوړول، د (۳۳۰) مترو په اوږدوالي پايپ غځول، د (۱۲) عامه شیردهنونو او (۱۹) سولر تختو نښلول شامل دي.
د دې شبکې د کار په بهیر کې د سیمې لسګونه تنه کاریګرو ته د کار زمینه برابره شوې وه او په بشپړېدو سره یې د نوموړي ښارګوټي (۳۰۰) کورنیو د څښاک پاکو اوبو ته لاسرسی پیدا کړ.
