په غور کې پر ۱۵ کیلومتره سرک کریړ اچول پیل شول
د غور ولایت په مرکز فیروز کوه کې د کلیو بیا رغونې او پرمختیا وزارت د کلیوالي لارو جوړولو پروګرام له خوا د ۷.۶ میلیونه افغانیو په ارزښت پر ۱۵ کیلومتره سرک کریړ اچول پیل شول. دا ۱۵ کیلو متره سرک دریو لوریو ته ( ۷ کیلو متره د المند خواته، ۵ کیلومتره د کندیوال پر لوري او ۳ کیلومتره د دره شیخا خواته) غځیدلی دی چې په اوږدو کې ۱۶ پلچکونه هم رغول کیږي.
ددې پروژې د کار په اوږدو کې به د سیمې ګڼ شمیر خلکو ته د کار زمینه برابره شي او په بشپړتیا سره به یې د شیخ المند، کندیوال او دره شیخا د کلیو د خلکو ترانسپورتي ستونزې هم هوارې شي.
