لتون:

په څلورو كلونو كې ۴۰۰ ميليونه امريكايي ډالره پر پرمختيايي پروژو لګول شوي دي

كابل د دسمبر 9 مه ۲۰۰۷:

د ملي پيوستون پروګرام د ۴۰۰ ميليونو امريكايي ډالرو پر بودجې د انكشافي پروژو په تطبيق كې لوړې كچې ته رسيدلى دى. او د كارونو د پرمختګ لپاره يې ۱۶۰۰۰ كليوالي پرمختيايي شوراګانې جوړې كړې دي.

د ملي پيوستون پروګرام د ۴۰۰ ميليونو امريكايي ډالرو تر څنګ د څاګانو، ښوونځيو، ټولنيزو مركزونو او سړكونو د رغونې په برخه كې د ۴۰ ميليونو امريكايي ډالرو په ارزښت د كليوالو ونډه هم د پام وړ پانګه جوړوي. دا كار د كليو د پراختيا په بهير كې د خلكو د پراخ ګډون او په پرمختيايي پروژو كې د مالكيت د حس په راپورته كولو کې مهم رول لوبولى دى.

دې بودجې د هېواد د ۳۴ ولاياتو د ۳۶۴ ولسواليو څخه په ۳۵۲ ولسواليو كې ۳۰۶۰۰ پروژې پلي كړي دي او د ۱۳۸۶ كال د عقرب د مياشتې راهيسي يې له ۱۹۶۹۰ څخه په زياتو كليو كې د  ملي پيوستون پروګرام د مرستندويه موسسو په مرسته عملي كړي. چې د هغوى له منځه ۱۸۴۹۰ كليو خپلې كليوالې پرمختيايي شوراګانې ټاكلي دي او د ۱۸۲۳۰ كليو پرمختيايي پلانونه بشپړ شوي دي.

د كليو بيا رغونې او پراختيا وزير ښاغلى محمد احسان ضياء په دې اړه وويل "د دغو مالي مرستو له لارې كولى شو په كليو او بانډو كې د پرمختيا او د سولې په ټينګښت كې كوټلي ګامونه پورته كړو"

هغه زياته كړه د ملي پيوتون پروګرام كولى شول تر ۵۰۰ ميليونو ډالرو زياتې پيسې كليوالي شوراګانو ته د پروژو د تطبيق لپاره وركړي خو په دې شرط چې منل شويو پروژو لپاره نړيوالې ټولنې لا زياتې ژمنې كړې وى. نړيوالې ټولنې نه زموږ هيله داده چې په دغه لار كې د خپلو مرستو بهير نور هم ګړندى كړي چې وكولى شو د خلكو په همكارۍ او مرسته د كليو په پراختيا كې فعاله ونډه واخلو.

كليوالي شوراګانې د يووالي، پيوستون او سالمې محلي ادارې د پرمختګ په لاره كې فعاله او مسئولانه ونډه لري. ښځې او نارينه د شوراګانو په جوړيدو كې ونډه اخلي. ټاكل شوې شوراګانې د انكشافي پلانونو لكه د برېښنا، روغتيايي اسانتياؤ، پلونو، ښوونځيو، سړكونو، اوبو لګولو وړو بندونو او نورو پروژو د تطبيق په لاره كې د ځايي خلكو له ملاتړ څخه برخمنې دي.

د ملي پيوستون پروګرام د افغانستان د اسلامي جمهوري دولت له خوا جوړ شوى چې له لارې يې د هېواد والو د ژوندانه په ښه كيدو او د ګټورو پروژو په پلي كولو كې بنسټيز رول ولوبوي. دغه پروګرام خلكو ته واك وركړى دى چې پروژې په خپله په ګوته او تطبيق كړي. د ملي پيوستون پروګرام د كليو په بيارغاونه، بيوزلۍ په راكمولو او له منځه وړلو كې اساسي رول لوبوي د زياتو معلوماتو لپاره انترنيتي پاڼې ته مراجعه وكړئ www.nspafghanistan.org او يا له info@nspafghanistan.org سره تماس ونيسئ.