لتون:

په ۲۴ ولايتونوكې ۸۳ پراختيايي پروژې

كابل - چهارشنبه ( د ۱۳۸۶ كال د ليندۍ ۱۴مه) :-
د كليو دبيارغونې او پراختيا وزير محمد احسان ضيا د ۸۵۸۹۳۸۱  امريكايي ډالرو په ارزښت د ۸۳ پراختيايي پروژو قرار دادونه نن له خصوصي شركتونو سره لاسليك كړل.

په قرار داد شويو پروژو كې ۱ روغتون، ۱ حيواني كلينك، ۱ صحي كلينك، ۱۰۹۵ د اوبو څاگانې، ۲۲۳۹ مبرزونه، د اوبو رسولو ۳ شبكې، د اوبو يوه ذخيره، ۳ پلونه، ۴.۲ كيلومتره سړك، ۶ ودانۍ ۱۶ صنفي ښوونځي، ۴ ودانۍ ۸ صنفي، د دوه جنراټورونو اخيستل، د سټلايټونو لگونه او په ولايتونو كې د انټرنيټي اسانتياو برابرونه شامل دي.

يادې شوې پروژې د بادغيس، باميان، بدخشان، بغلان، بلخ، پروان، پكتيا، پكتيكا، تخار، جوزجان، خوست، دايكندي، زابل، ‌سرپل، سمنگان، فارياب، غور،‌كابل، كندز، لغمان، لوگر، ننگرهار، هرات او هلمند په ولايتونوكې تطبيق كيږي، د دغو پروژو د تطبيق موده چې 294658 كاري ورځې به ايجاد كړي، شپږ مياشتې ده  او په اوږد مهال كې 2600216هيوادوال به ددغو پروژو د اقتصادي او ټولنيز و گټو څخه برخمنې شي.

د كليو د بيارغونې او پراختيا وزير د دغو قرار دادونو د لاسليك كولو پرمهال وويل:" د كليو دبيارغونى او پراختيا وزارت  په خپلو پراختيايي فعاليتونوكې د خلكو په لومړيتوبونو،  پايه داره پراختيا، چاپيريال ساتنې، د حقوقو برابر والي او دخلكو غوره عنعناتو او كلتور ته په درناوي تكيه كوي، هغه زياته كړه: د دغو پروژو له تطبيق څخه هدف په كليو او بانډوكې په هر اړخيز او هماهنگه توگه د پراختيايي چارو ترسره كول او دهيواد په بيوزلو سيموكې دظرفيتونو پياوړتيا او پايه داره پراختيا ده."

د ۱۰۹۵ څاګانو كيندل و د اوبو رسولو شبكي  به د ۲۲ ولاياتو 198880 كليوالو ته پاكې اوبه برابرې كړي او په دې ډول به د هغو ناروغيو كچه راټيټه كړي چې له ناپاكو اوبو رامنځته كيږي.

همداراز سټلايټي وسايلو په لګولو سره د كليو بيا رغونې او پراختيا وزارت ۳۴ ولايتي نمايندگۍ به د انترنيت په وسيله سره وتړل شي او په دې ډول به د كار كيفيت ښه او له ولايتي دفترونو سره په ارتباطاتو كې د ستونزو كچه نوره هم راكمه شي.

د دغو پروژو بوديجه دبيلابيلو منابعو لكه يونيسف،  يو ان ايچ سي ار، يو ان دي پي،  داياگ پروگرام ، بلجيم،  هند، جاپان، ناروي او د كليو دبيارغونې او پراختيا وزارت د عادي بودجې څخه تمويليږي.

دكليو د بيارغونې او پراختيا وزارت د نړيوالې ټولنې په مرسته د خپلو ملي پروگرامونو لكه ملي پيوستون، سيمه ييزې ودې او پراختيا، د څښاك د اوبو برابرولو او روغتيا ساتنې، كليو ته دسړك جوړولو او دكوچنيو پورونو له لارې تل هڅه كوي ترڅو د كليو او بانډو خلكوته ټولگټې او هراړ خيزه خدمتونه ترسره كړي.